Reyna að forðast reynslulausn barnaníðings

Brynjar Níelsson, skipaður verjandi Ágústar Magnússonar, dæmds barnaníðings, segir að lögreglan á höfuðborgarsvæðinu dragi að gefa út kæru á hendur honum til að koma í veg fyrir að hann fái reynslulausn úr fangelsi.

Ekki er búið að gefa út ákæru á hendur Ágústi Magnússyni í svokölluðu Kompásmáli. Ágúst leitaði eftir kynferðislegu sambandi við manneskju sem sagðist vera 13 ára gömul.

Búið er að ákæra þrjá aðra vegna sama máls en mál Ágústs situr á hakanum. Hann afplánar nú fimm ára fangelsisdóm vegna eldri brota en hefur átt rétt á að sækja um reynslulausn frá því í maí á þessu ári. Hins vegar er hægt að synja honum um reynslulausn á þeirri forsendu að mál hans sæti lögreglurannsókn og ekki sé búið að ákæra.

Lögreglan á höfuðborgarsvæðinu hafnar því alfarið að rannsókn málsins sé vísvitandi dregin á langinn. Björgvin Björgvinsson, yfirmaður kynferðisbrotadeildar, segir að rannsókn á máli Ágústar sé ólokið vegna þess að ekki sé búið að kanna hvort barnaklám sé á tölvu í hans eigu sem lögreglan hefur lagt hald á.

Brynjar Níelsson hafnar skýringum lögreglunnar og segir ótrúlegt að það taki níu mánuði að kanna eina tölvu. Hann bendir á að einn hinna þriggja sem þegar hafi verið ákærðir séu einnig ákærðir fyrir vörslu barnakláms. Það hafi tekið mun skemmri tíma að kanna tölvu hans. Hann bendir einnig á að Kompásmálið og málið sem varðar vörslu barnakláms séu aðskild mál. Ekki sé nauðsynlegt að ákæra í þeim á sama tíma.

Brynjar segir að jafnvel þótt Ágúst hafi gerst sekur um alvarleg brot verði hann að njóta réttar. Því sé hann verulega ósáttur við það að mál hans séu sett í biðstöðu. Mál Ágústar hefðu átt að vera sett í forgang svo hann gæti sótt um reynslulausn.

Valtýr Sigurðsson fangelsismálastjóri segir að Ágúst hafi ekki sótt um reynslulausn. Hann myndi að sjálfsögðu fá rökstutt svar ef slík beiðni bærist. Valtýr segir að ekki sé verið að bíða með rannsókn málsins svo hægt sé að halda Ágústi lengur. Hins vegar megi efast um að Ágúst sé tilbúin til að fá reynslulausn. Hann geti verið líklegur til að brjóta af sér aftur og þurfi meiri tíma í fangelsi.