Ákært í fjórum líkamsárásarmálum í Reykjanesbæ

Fjórar ákærur vegna líkamsárása voru þingfestar í Héraðsdómi Reykjaness í dag. Allar árásirnar áttu sér stað í Reykjanesbæ. Nokkra athygli vekur að rúm þrjú ár eru liðin frá einni árásinni.

Karlmaður fæddur 1987 er ákærður fyrir að hafa ráðist á farþega í kyrrstæðri bifreið við veitingastaðinn Nýjung í Reykjanesbæ í apríl árið 2004. Fórnarlambið nefbrotnaði í árásinni.

Þá er karlmaður fæddur 1986 ákærður fyrir sérstaklega hættulega líkamsárás á veitingastaðnum Trix í Reykjanesbæ í september í fyrra en hann er sakaður um að hafa slegið annan mann með glasi í andlitið svo af hlutust fjölmargir skurðir.

Enn einn maðurinn er síðan ákærður fyrir að ráðast að sambýliskonu sinni í Reykjanesbæ í nóvember á síðasta ári. Hann er sagður hafa tekið konuna kverkataki og hent henni í gólfið svo hún marðist og tognaði á hálsi, baki og yfir bringspölunum.

Fjórða atvikið átti sér stað í Hafnargötunni í Reykjanesbæ þegar maður fæddur árið 1986 réðst að öðrum manni með hnefahöggum. Sá sem fyrir árásinni varð hlaut glóðarauga, bólgu á efri vör og sár innan á kinnum. Auk þess brotnaði upp úr fjórum tönnum.