Vill að þriðjungur námslána verði styrkur

Framsóknarflokkurinn vill að þriðjungi námslána verði breytt í styrk ljúki menn námi á tilsettum tíma. Það myndi auka bæði skilvirkni og hagkvæmni í skólakerfinu, segir Birkir Jón Jónsson þingmaður Framsóknar.

Þingið verður sett á mánudaginn og strax á fyrstu dögum þingsins ætlar Birkir Jón að leggja fram frumvarp um að þriðjungur námslána verði breytt í styrk ljúki menn lokaprófum í formlegu námi á tilsettum tíma. Birkir er staddur á Raufarhöfn en hann sagði í samtali við fréttastofu í morgun, að yrði þetta að veruleika yrði það enn meiri hvati fyrir námsmenn að ljúka námi sínu á tilsettum tíma. Þá myndi fólk skila sér fyrr út á vinnumarkaðinn og þar af leiðandi ykist skilvirknin í kerfinu.

Í greinargerð með frumvarpinu kemur fram að brottfall nemenda í háskólum landsins árin 2003-5 var á bilinu 19-57% eftir eins árs nám. Það sé menntakerfinu dýrt og því tilvalið að nýta hagræna hvata til að sporna við brottfallinu. Bent er á að þessi aðferð tíðkist á Norðurlöndunum, að verðlauna námsmenn sem ljúka námi á eðlilegum tíma með því að breyta hluta námslána í óafturkræfan styrk.

Áætlaður kostnaður við þetta er um 1600 milljónir króna á ári. Á móti er gert ráð fyrir sparnaði í menntakerfinu þar sem menn ljúki námi fyrr en ella. Áætlað er að LÍN láni um 10,7 milljarða króna á næsta ári. Samkvæmt útreikningum Ríkisendurskoðunar er beinn ríkisstuðningur við LÍN um helmingur af þessari upphæð vegna vaxtaniðurgreiðslna og affalla.