Segir óábyrgt að tala krónuna niður

Forsætisráðherra segir málfrelsi ríkja í Sjálfstæðisflokknum til að tala um Evrópumál. Hann segir hins vegar óábyrgt ef menn vilji tala niður gjaldmiðil Íslands.

Samband ungra sjálfstæðismanna ályktaði nýlega að tímabært væri að taka til alvarlegrar skoðunar kosti og galla þess fyrir íslenskt hagkerfi, almenning og athafnalíf, að halda úti eigin mynt. Það taldi rétt að kanna hvort Íslendingar gætu tekið upp evru án aðildar að Evrópusambandinu.

Úr þingliði sjálfstæðismanna heyrist einnig kall eftir opinskárri umræðu um Evrópusambandið, frá Guðfinnu Bjarnadóttur.

Guðfinna Bjarnadóttir segir lykilatriði fyrir umræðuna að fá það á hreint hvort Íslendingar geti tekið upp evru án þess að ganga í Evrópusambandið.