Fagna losunarheimildum til stóriðjufyrirtækja

Náttúrverndarsamtök Íslands fagna áformum umhverfisráðherra um úthlutun losunarheimilda til stóriðjufyrirtækja sem kynnt voru í gær. Álfyrirtæki á Íslandi hafi notið sérstakrar undanþágu frá Kyoto-bókuninni fyrir ókeypis losunarheimildum. Stjórnvöld verði að stöðva þessa þróun og; „gera þeim sem menga skylt að borga fyrir mengunarheimildir," segir í tilkynningu frá samtökunum.

Hingað til hafi fyrirtæki á borð við Alcoa nýtt sér gestrisni og þjónustulund stjórnvalda víða um heim. Það sé ódýrara fyrir álfyrirtæki að halda áfram menguninni, en að nýta sér nýja tækni sem valdi minni mengun.

Samtökin gagnrýna stjórnvöld fyrir að hafa ekki mótað stefnu fyrir fund Loftslagssamnings Sameinuðu þjóðanna sem fram fer á Bali í Indónesíu í desember. Á fundinum verður reynt að ná samkomulagi um samdrátt í losun gróðurhúsalofttegunda á næsta skuldbindingartímabili Kyoto sáttmálans, en það hefst árið 2013.

„Til að Ísland geti gegnt forustuhlutverki á fundinum í Bali verða stjórnvöld að kynna hið fyrsta hver séu samningsmarkmið Íslands," segir ennfremur í tilkynningunni.