Skrautleg upptaka hjá Spice Girls

Myndbandsupptaka hjá Spice Girls snérist upp í sannkallaða divu móðursýki enda engin smáegó samankomin í hópnum. Ein þeirra grét stöðugt, önnur stundaði íhugun og sú þriðja hafði aðstoðarkonu stöðugt á hælunum með jarðarber og kampavín.

Enska blaðið The Sun greinir frá þessari fyrstu myndbandsupptöku síðan Spice Girls komu saman aftur. Geri Halliwell seinkaði öllum hlutum þar sem hún þurfti stöðugt að stunda íhugun og framkvæma dularfulla sálræna gjörninga. Auk þess var hún ekki viðræðuhæf fyrr en einhver útvegaði henni ákveðna tegund af flöskuvatni.

Victoria Beckham var ekki mikið í flöskuvatninu en aftur á móti mætti hún með sérstaka aðstoðarkonu sem fygldi henni eins og skugginn með bakka af jarðarberjum og kampavínsflösku.

Og á meðan Mel B blótaði flugþreytu sinni stöðugt grét Emma litla þar sem upptökunni virtist aldrei ætla að ljúka af framangreindum ástæðum.