Gómaður þrisvar sama sólarhringinn

Sýslumaðurinn á Akranesi þingfesti í dag mál á hendur tvítugum karlmanni frá Hveragerði sem afrekaði það að vera gómaður þrisvar sinnum sama daginn af lögreglunni á írskum dögum á Akranesi.

Óhappadagur þessa unga afbrotamanns var þann 7. júlí síðastliðinn. Hann var þá staddur ásamt öðrum félögum sínum á Akranesi en þá helgi var haldið upp á írska daga.

Klukkan 02:47 þennan dag var afbrotamaðurinn ungi gripinn með tæpt gramm af amfetamíni og þrjár e-pillur. Lögreglan fann efnin við leit á honum á tjaldstæðinu á Akranesi.

Rúmum þrem tímum síðar, eða klukkan 06:05, var sami maður gripinn glóðvolgur við akstur undir áhrifum eiturlyfja. Hann var stöðvaður þar sem hann ók um Stillholt á Akranesi en þess má geta að lögreglustöðin á Akranesi er þar til húsa. Við leit í bíl mannsins í það skiptið fundust rúm átta grömm af amfetamíni og lítilræði af tóbaksblönduðu hassi. Í þvagsýni sem maðurinn gaf fannst svo amfetamín og kókaín.

Að lokum var svo afbrotamaðurinn ungi gómaður í þriðja og síðasta skiptið sama sólarhringinn rétt fyrir miðnætti. Lögreglan var þá við eftirlit á tjaldstæði í bænum. Þegar maðurinn kom auga á lögreglu sást hann henda frá sér tæpu grammi af hassi. Lögreglan lagði hald á efnið og tók enn eina skýrsluna af afbrotamanninum. Það var sem betur fer sú síðasta þá helgina.

Við þingfestingu málsins í Héraðsdómi Vesturlands í dag játaði ákærði öll brot sín greiðlega. Málið var því dómtekið og er niðurstöðu að vænta innan nokkura vikna.