Ákvörðun um gestaþjóð bókamessu í lok nóvember

Stjórn bókakaupstefnunnar í Frankfurt ákveður á fundi sínum í lok nóvember hvort það verði Íslendingar eða Finnar sem verða gestaþjóð á kaupstefnunni árið 2011. Forsvarsmenn kaupstefnunnar, sem er ein sú stærsta í heimi, eru mjög áhugasamir um þátttöku Íslendinga að sögn aðstoðarmanns menntamálaráðherra.

Steingrímur Sigurgeirsson, aðstoðarmaður Þorgerðar Katrínar Gunnarsdóttur menntamálaráðherra, segir að íslensk stjórnvöld hafi þegar lagt fram umsókn um að verða gestaþjóðin á bókamessunni, en hún er haldin í október ár hvert. Þorgerður Katrín sótti messuna í þarsíðustu viku og átti þá fund með Jürgen Boos, framkvæmdastjóra bókamessunnar, vegna umsóknar Íslendinga. Segir Steingrímur að á þeim fundi hafi komið fram að ákvörðun um það, hver verði gestaþjóð messunnar árið 2011, verði tekin á fundi stjórnar messunnar í lok nóvember. Segir Steingrímur að forsvarsmenn bókamessunnar hafi verið mjög áhugasamir um þátttöku Íslands.

Þorgerður Katrín ræddi einnig við fulltrúa Katalóna á messunni en þeir voru gestaþjóðin í ár. Kynnti Þorgerður sér hvernig Katalónar hefðu staðið að undirbúningi kynningarinnar. Enn fremur hitti menntamálaráðherra Íslendinga sem tóku þátt í messunni.

Sem fyrr segir er bókakaupstefnan í Frankfurt ein sú stærsta í heimi. Forsvarsmenn forlaga hér á landi segja að það hafi gríðarlega þýðingu, bæði fyrir íslenskar bókmenntir og Ísland í heild, verði þjóðin fyrir valinu sem gestaþjóð.

Fjallað verður um Ísland allt árið á undan messunni í þýskum fjölmiðlum og þá verður áhersla á íslenskar bókmenntir í öllum bókabúðum Þýskalands. Valið stendur hins vegar á milli tveggja þjóða, Íslendinga og Finna.