Lóð Glitnis á Kirkjusandi margfaldast í verði

Það var töluvert umdeilt þegar Reykjavíkurborg seldi Glitni lóð Strætó á Kirkjusandi í mars í fyrra fyrir 972 milljónir króna í borgarstjóratíð Steinunnar Valdísar Óskarsdóttur. Í níu mánaða uppgjöri Glitnis kemur fram endurmat á lóðinni sem nú er metin á 3,4 milljarða króna, eða þrefalt hærra verð en söluverð borgarinnar var. Þess ber þó að geta að inn í þessu mati er hluti lóðarinnar þar sem höfuðstöðvar bankans eru á Kirkjusandi og sem Glitnir átti áður.

Hér er um að ræða uppfært verðmat á lóðunum. Vala Pálsdóttir forstöðumaður fjárfestatengsla Glitnis, segir að fengnir hafi verið tveir óháðir sérfræðiaðilar til að meta verðmæti lóðanna. Bankinn hafi síðan tekið meðaltal af mati þessara aðila og áætlað verðmæti lóðanna 80% af því meðaltali. Þannig að bankinn bókfærir verðmæti lóðanna lægra en sérfræðiaðilarnir gerðu.

Engu að síður er verðmæti lóðanna mikið og ef áætlað er að sá hluti sem borgin seldi bankanum sé helmingur samanlagðrar stærðar lóðanna, þá hefur verðmæti borgarlóðarinnar aukist um fimm til sjö hundruð milljónir króna á 18 mánuðum. Fréttastofan hefur hins vegar ekki upplýsingar um það hvernig skiptingin er milli þeirrar lóðar sem bankinn átti áður og þess hluta sem hann keypti af borginni.

Tekjur bankans hafa aukist um 28% á fyrstu níu mánuðum ársins og hagnaður fyrir skatta á þessu tímabili er rétt rúmlega 30 milljarðar. Verðmæti lóðanna á Kirkjusandi er því sem nemur um 10 prósentum af hagnaði bankans.

Glitnir hyggst reisa nýjar höfuðstöðvar á strætóreitnum, en samkvæmt samkomulagi við borgina fer hluti lóðarinnar undir lágreista byggð.