Enski í dag: Torres með tvö í auðveldum sigri Liverpool

Liverpool vann í dag góðan 4-1 sigur á Hermanni Hreiðarssyni og félögum í Portsmouth í ensku úrvalsdeildinni. Ívar Ingimarsson var á skotskónum með Reading þegar liðið lagði Sunderland 2-1 á heimavelli.

Liverpool lagði grunnin að góðum sigri á Sunderland með tveimur mörkum snemma leiks. Yossi Benayoun kom Liverpool á bragðið á Anfield á 13. míntútu og aðeins þremur mínútum síðar skoraði Sylvain Distin sjálfsmark fyrir Portsmouth.

Þannig var staðan í hálfleik og tvö mörk frá Fernando Torres (67. og 85.) tryggðu Liverpool sigurinn. Benjani minnkaði muninn fyrir Portsmouth á 57. mínútu en sigur heimamanna var aldrei í hættu.

Portsmouth hafði unnið sex leiki í röð á útivelli í deildinni en liðið var lakari aðilinn lengst af á Anfield í dag.

Liverpool náði á hinn bóginn að rétta úr kútnum eftir tvö töp í röð fyrir Manchester United í deildinni og Chelsea í deildarbikarnum.

Ívar á skotskónum

Ívar Ingimarsson kom Reading í 1-0 gegn Sunderland en Michael Chopra jafnaði fyrir gestina með marki úr vítaspyrnu nokkuð gegn gangi leiksins. Það var svo Stephen Hunt sem tryggði Reading verðskuldaðan sigur með marki á lokamínútunni. Brynjar Björn Gunnarsson var nokkuð óvænt í byrjunarliði Reading eftir að hafa verið frá keppni vegna hnémeiðsla.

Bolton vann sannfærandi 3-0 sigur á Birmingham þar sem Nicolas Anelka fór mikinn - skoraði tvívegis og lagði upp fyrsta mark leiksins fyrir El Hadji Diouf.

Aston Villa og Man City skildu jöfn 1-1 í Birmingham þar sem Ítalinn Bianchi kom gestunum yfir en Norðmaðurinn John Carew jafnaði fyrir Villa fyrir hlé.

Fulham og Wigan skildu höfn 1-1 þar sem Marcus Bent var enn í stuði og kom gestunum í Wigan yfir, en Bandaríkjamaðurinn Clint Dempsey jafnaði fyrir Fulham.

West Ham vann góðan útsigur á Middlesbrough á útivelli 2-1. David Wheather kom heimamönnum yfir á 40. mínútu en Dean Ashton jafnaði skömmu fyrir hlé. Það var svo Scott Parker sem var hetja Íslendingaliðsins þegar hann skoraði sigurmarkið á 90. mínútu.

Arsenal með fjögurra stiga forskot

Eftir leiki dagsins er Arsenal sem fyrr í efsta sæti deildarinnar með 43 stig eftir góðan sigur á grönnum sínum í Tottenham í dag - fjórum stigum meira en Manchester United sem á leik til góða gegn Everton á heimavelli á morgun.

Chelsea er í þriðja sætinu með 34 stig líkt og Manchester City, en Chelsea á leik til góða á City þegar liðið sækir Blackburn heim á morgun. Liverpool er svo í fimmta sætinu með 33 stig og Everton og Portsmouth eru í sætum sex og sjö með 30 stig.