Veitingastað lokað

Nýr veitingastaður leikarans Paul Newman, The Dressing Room, varð fyrir miklu vatnstjóni eftir að lagnir gáfu sig.

Slökkviliðsmenn voru kallaðir á staðinn og lak þá mikið vatn úr loftinu. „Við erum frekar pirraðir út af þessu,“ sagði meðeigandi staðarins Michel Nischan. „Þetta var komið á svo gott flug hjá okkur.“

Svo gæti farið að staðnum verði lokað í eina viku vegna skemmdanna. Staðurinn, sem hefur að geyma 128 sæti fyrir matargesti, var opnaður í október.

Newman, sem er 82 ára, á staðinn með Nischan. Hann hefur einnig getið sér gott orð í matvælaiðnaðinum m.a. fyrir örbylgjupopp sitt. Á meðal vinsælustu mynda hans í gegnum tíðina eru The Color of Money, Cool Hand Luke, Hud og Cat on a Hot Tin Roof.