Tveir stöðvaðir fyrir ölvunarakstur í gærkvöld

Tveir ökumenn voru teknir fyrir ölvunarakstur í Reykjavík í gær. Annar var stöðvaður á Bústaðavegi um kvöldmatarleytið en hinn í Laugardal síðar um kvöldið.

Bíll þess fyrrnefnda var jafnframt búinn tveimur nagladekkjum og á viðkomandi sekt yfir höfði sér fyrir það að auki. Þá stöðvaði lögreglan 19 ára ökumann í miðborginni í nótt en grunur lék á að hann væri undir áhrifum fíkniefna. Pilturinn virti stöðvunarmerki lögreglu en reyndi síðan að komast undan á hlaupum. Hann komst þó ekki langt og var handsamaður og færður á lögreglustöð.

Tuttugu og fimm umferðaróhöpp voru tilkynnt til lögreglunnar á höfuðborgarsvæðinu á síðasta sólarhring. Flest voru minniháttar en í tveimur tilvikum var fólk flutt á slysadeild.