Gísli Marteinn er megakroppur með nýju hárgreiðsluna

Glöggir menn tóku eftir því á fundi í Ráðhúsinu í dag að Gísli Marteinn Baldursson er orðinn ansi hreint hárprúður.

Aðspurður um hvort hann sé að fylgja tískustraumum segir Gísli að ef svo sé þá sé það algerlega ómeðvitað. "Ég gerði mér bara ekki grein fyrir því að ég væri orðinn svona síðhærður," segir hann í samtali við Vísi. Hann segist þó fagna því ef hann hafi óvart tollað í tískunni.

Svavar Örn, hárgreiðslumaður Gísla, segir þá félaga í sameiningu hafa ákveðið að leyfa hárinu að njóta sín. Svavar er ánægður með hversu jákvæður Gísli er fyrir hugmyndum hans. "Mér finnst hann megakroppur svona," segir Svavar. Hann segir sítt hár ekkert endilega í tísku hjá strákum og að hann reyni bara að fara eftir persónunni.

Svavar er mjög ánægður með kúnna eins og Gísla og segir að starfið yrði mjög einhæft ef allir vildu lögguhnakka.