Reykjavík verði grænasta borg veraldar

Flutningur samgöngumála til umhverfissviðs borgarinnar er liður í áætlunum borgaryfirvalda að gera Reykjavík að grænustu borg veraldar. Þetta segir Gísli Marteinn Baldursson, formaður umhverfisráðs.

Gísli Marteinn Baldursson, borgarfulltrúi Sjálfstæðislfokksins, hefur verið formaður umhverfissviðs og verður formaður nýs umhverfis- og samgöngusviðs. Hann segir að óljós skil hafi verið milli samgöngu- og umhverfismála í borginni og spurning til dæmis hvort hjólreiðamál og málefni nýrra orkugjafa eins og metans og etanóls eigi að teljast umhverfismál eða samgöngumál. Með þessum breytingum séu samgöngumál gerð að umhverfismálum sem að mati borgaryfirvald sé framsækið skref.

Grænu skrefin ekki marklaust plagg

Nú þegar hafa borgaryfirvöld tekin ákveðin skref í umhverfismálum með því að bjóða námsmönnum ókeypis í strætó og bjóða upp á ókeypis bílastæði fyrir vistvæna bíla í miðborginni. „Hugmyndir okkar um hin grænu skref sem við kynntum í vor eru ekki marklaust plagg heldur verður áfram unnið í samræmi við það sem þar kemur fram," segir Gísli og bendir meðal annars á að taka eigi göngustíginn frá Ægisíðu og upp í Elliðaárdal í gegn og aðskilja hjóla- og gönguumferð þar sem því verði komið við. Þá verði stígurinn hitaður og lýstur á köflum þannig að betur verði hægt að nýta hann yfir vetrartímann.

Gísli bendir enn fremur að með sameiningu umhverfismála og samgöngumála undir einn hatt verði til að mynda mislæg gatnamót skipulögð með hagsmuni allra samgöngumáta að leiðarljósi, en ekki eingögu einkabílsins.

„Svo ætlum við sem vinnum hjá borginni að taka allt okkar kerfi í gegn og kanna hvar við getum gert betur," segir Gísli og bendir á að innan skamms flytjist umhverfissvið inn í Höfðatorg ásamt nokkrum öðrum deildum borgarinnar. „Þar ætlum við að búa til samgöngustefnu fyrir okkar starfsfólk og ganga þannig á undan með góðu fordæmi," segir Gísli.

Fram kom í fréttum á dögunum að Reykjavík væri í hópi grænustu borga heims og segir Gísli að hún sé grænust samkvæmt ýmsum mælikvörðum. Ógnin vegna meðal annars svifryks sé hins vegar fyrir hendi og gæta þurfi vel að því. „Okkar borg á að vera með minnstu mengunina og hreinasta vatnið," segir Gísli.