Rekstur ríkisins 10 milljörðum kr. hagstæðari en í fyrra

Samkvæmt greiðsluuppgjöri ríkissjóðs er rekstur sjóðsins 10 milljörðum kr. hagstæðari en í fyrra. Á fyrstu sjö mánuðum ársins jókst handbært fé frá rekstri um 46,5 milljarða kr. innan ársins á móti 36,5 milljörðum á sama tíma í fyrra.

Fjallað er um málið í nýjasta vefriti fjármálaráðuneytisins. Þar segir m.a. að tekjur ríkissjóðs reyndust 36,4 milljörðum kr. hærri en á sama tíma í fyrra á meðan gjöld hækkuðu um 25,3 milljarða kr.

Eins og áður hefur komið fram á Vísi er hreinn lánsfjárjöfnuður nú neikvæður um 22,3 milljarða kr, en var jákvæður um rúma 34 milljarða kr. í fyrra. Skýrist þetta af kaupum ríkissjóðs á hlut Reykjavíkur og Akureyrar í Landsvirkjun og 44 milljarða kr. eiginfjárframlagi til Seðlabanka Íslands í byrjun maí.