Öflugt eftirlit ÍTR með íþrótta-tómstundafélögum

Öflugt eftirlit er með þeim níutíu íþrótta-og tómstundafélögum sem eiga aðild að frístundakortakerfi Reykjavíkurborgar af ótta við að þau hækki þátttökugjöldin með tilkomu kortanna. Á morgun geta rúmlega tuttugu þúsund börn byrjað að nota frístundakortin.

Frístundakort Reykjavíkurborgar verða tekin í notkun á morgun. 90 íþrótta og tómstundafélög eiga aðild að frístundakortakerfi Reykjavíkurborgar. Félögin skrá börnin sem verða hjá viðkomandi félagi inni í Rafrænu Reykjavík sem er skráningarkerfi borgarinnar.

Foreldrar þurfa fara inn til að ráðstafa styrk barnsins til viðkomandi félags og geta þannig fengið styrknum úthlutað. Styrkurinn er 12 þúsund krónur fyrir haustönn og hann verður 25 þúsund krónur í janúar á næsta ári.

Sólveig Valgeirsdóttir verkefnastjóri hjá ÍTR segir alltaf hættu á því að félög hækki þátttökugjöldin en ÍTR hafi mikið eftirlit með þeim málum. Hún segir nær útilokað að foreldrar geti misnotað kerfið. Styrkinn sé ekki hægt að nota í eitthvað annað þar sem hann sé eyrnamerktur því félagi sem foreldri skráir barn sitt í.

Sólveig segir líkamsræktarstöðvar eiga aðild að styrkjakerfinu en einungis sé hægt að nota frístundakortin fyrir einstök námskeið þau greiði ekki niður venjuleg líkamsræktarkort. Ástæðan sé að lítil eftirfylgni sé hjá líkamsræktarstöðvum og markmið kortanna sé að efla félagslegan þátt barna.