Undirverðlagning og ólögmætt verðsamráð helst til athugunar

Fimmtungur allra mála Samkeppniseftirlitsins síðasta árið varða matvörumarkaðinn. Undirverðlagning og ólögmætt verðsamráð eru helst til athugunar.

Í ársriti Samkeppniseftirlitsins kemur fram að fjöldi mála sem tengjast matvælamarkaðinum eru í athugun hjá eftirlitinu. Meðal annars hefur eftirlitið kannað hvort undirverðlagning hafi átt sér stað hjá smásölufyrirtækjum og mögulegt ólögmætt samráð innan samtaka Ferðaþjónustunnar.

Páll Gunnar Pálsson forstjóri Samkeppniseftirlitsins segir ekkert hafa verið aðhafst í þessum málum enn sem komið er.

Þá er eftirlitið að kanna viðskiptasamninga birgja og endurseljenda og innflutningsvernd á landbúnaðarvörum. Páll hvetur öll fyrirtæki og einstaklinga til að tilkynna um brot á samkeppnislögum. Með nýrri löggjöf sem tók gildi í vor er það í raun hagur allra að tilkynna um ólögmætt samráð.