Gréta Gunnarsdóttir sviðsstjóri öryggissviðs hjá utanríkisráðuneytinu

Gréta Gunnarsdóttir hefur verið ráðin sviðsstjóri alþjóða- og öryggissviðs utanríkisráðuneytisins og kemur hún til starfa í byrjun október. Fram kemur í tilkynningu frá ráðuneytinu að hún taki við starfinu af Bergdísi Ellertsdóttur sem tók í sumar við starfi aðstoðarframkvæmdastjóra EFTA í Brussel.

Gréta Gunnarsdóttir, sem er lögfræðingur að mennt, hefur starfað í utanríkisþjónustunni frá árinu 1988 og tók meðal annars þátt í samningaviðræðunum um Evrópska efnahagssvæðið. Hún hefur síðustu tvö ár gegnt yfirmannsstöðu hjá flóttamannahjálp Sameinuðu þjóðanna við Palestínu og verið búsett í Jerúsalem.