Tekist á um bæjarskrifstofur í Reykjanesbæ

Minnihluti bæjarstjórnar í Reykjanesbæ gagnrýnir harðlega þá ákvörðun meirihlutans að fela eignarhaldsfélaginu Fasteign hf. að vinna að tillögum að nýjum bæjarskrifstofum í Reykjanesbæ. Á heimasíðu Víkurfrétta er sagt frá því að tillagan hafi verið samþykkt af meirihluta en að minnihluti hafi lagt fram bókun þar sem vinnubrögðin eru gagnrýnd. Sjálfstæðismenn segja um miskilning að ræða þar sem Fasteign hf. sé í eigu bæjarins.

Í bókuninni segjast minnihlutamenn vera andvígir þeirri aðferðafræði sem sjálfstæðismenn hyggist beita við bygginguna. „Enn á ný ætlar meirihluti sjálfstæðismanna í bæjarstjórn Reykjanesbæjar að fara í hundruð milljóna króna framkvæmdir á vegum bæjarins án þess að bjóða verkefnið út og leita hagstæðustu verða. " Minnihlutinn segir að þannig eigi ekki að fara með opinbert fé og samræmist þetta ekki góðri stjórnsýslu.

Fulltrúar minnihlutans taka fram að þeir styðji fyrirhuguð áform um að nýjar skrifstofur verði byggðar. „Hins vegar ber sveitarfélaginu að leita bestu verða með lögformlegu og opnu útboði eða forvali þar sem fleiri fyrirtækjum en Fasteign er boðin möguleiki á að keppa um verkefnið á jafnræðisgrundvelli."

Meirihluti sjálfstæðismanna lét í kjölfarið bóka eftirfarandi: „Enn á ný er um alvarlegan misskilning eða mistúlkun að ræða í bókun minnihlutans þar sem félagi í eigu Reykjanesbæjar, Fasteign hf, er falið að undirbúa verkefnið."