Alhvít jörð á Hellisheiði og snjóar í Esjuna

Veturinn gekk í garð á Hellisheiði í dag og í Þrengslum og Esjan setti upp hvítan koll. Þótt Hellisheiðin sé hvít yfir að líta þá var vegurinn að mestu auður enda veghitinn allt að þremur gráðum meiri en lofthitinn. Sumstaðar var þó krapi og hvatti lögreglan í dag ökumenn til að fara varlega.

Flestir eru enn á sumardekkjum enda snjólaust í byggð sunnan heiða. Reikna má með að snjór nái að festast á veginum yfir Hellisheiðina í kvöld enda lækkar þá hitastigið.

Víða á Suðurlandi var jörð orðin hvít. Slydda var á Höfn í Hornafirði, snjókoma á Fagurhólsmýri og slydda á Kirkjubæjarklaustri og í Vík í Mýrdal.

Tveir bílar fóru út af veginum á Reynisfjalli vestan við Vík í Mýrdal í dag. Bæði óhöppin má rekja til mikillar hálku á svæðinu og hvassviðris. Lögreglan segir glórulaust að fara yfir fjallið á sumardekkjum.

Á Norðurlandi hefur verið úrkomulaust en frost fór niður í sjö stig í Ásbyrgi í nótt sem telst nokkuð óvenjulegt á þessum árstíma þótt ekki liggi fyrir hvort um metkulda sé að ræða.