Lögmaður Færeyja sæmdur stórriddarakrossi

Ólafur Ragnar Grímsson, forseti Íslands, sæmdi í dag Jóannes Eidesgaard, lögmann Færeyja, stórriddarakrossi með stjörnu fyrir framlag hans til að styrkja samvinnu Íslendinga og Færeyinga. Fram kemur í tilkynningu frá forsetaembættinu að þetta hafi verið gert við hátíðlega athöfn á Bessastöðum.

Við þetta tækifæri fagnaði forseti Íslands þeim áfanga að Færeyingar myndu síðar í dag opna Sendistovu á Íslandi sem gæfi þjóðunum tækifæri til að styrkja samvinnu sína á enn fleiri sviðum.

Sendiskrifstofa Færeyja verður til húsa að Austurstræti 12 og verður sérstök athöfn í Ráðhúsi Reykjavíkur klukkan 15 þar sem opnuninni er fagnað. Þar ávarpa Eidesgaard og Ingibjörg Sólrún Gísladóttir utanríkisráðherra gesti. Á milli klukkan 17 og 19 verður sendiskrifstofan svo opin almenningi.