Vistvænir bílar til sýnis í Perlunni

Tveir fyrstu etanólbílar landsins verða til sýnis í Perlunni um helgina. Útblástur koltvíoxíðs frá þessum bílum er um áttaíu prósent minni en í venjulegum bensínbíl.

Í dag og á morgun verður bílasýning í Perlunni á visthæfum bílum í tengslum við ráðstefnuna Orkugjafar framtíðarinnar í samgöngum sem hefst á mánudaginn.

Þarna eru nú til sýnis etanólbílar, einn frá Volvo og annar frá Ford. Etanólbílarnir eru tvíorkubílar, það er þeir geta nýtt bæði bensín og lífetanól sem eldsneyti. Þeir eru nú þegar í notkun meðal annars í Bandaríkjunum, Brasilíu og Svíþjóð en þar er nú hægt að dæla lífetanóli á bílinn á nærri eitt þúsund benínstöðum. Rúmlega 70 þúsund etanólbílar eru í notkun í Svíþjóð og fjölgar þeim um þrjú þúsund á mánuði.

Etanólbílar þykja mjög raunhæf lausn hér á landi enda má nota á þá bensín ef lífetanólið er ekki fáanlegt. Fyrsta dælan fyrir lífetanól verður vígð á benínstöð Olís við Álfheima á mánudaginn. Eldsneytið er unnið úr trjáafgöngum sem falla til í sjálfbærum trjáiðnaði Svíþjóðar.