Reyndi að lokka tíu ára stúlkur upp í bíl

Lögreglan á höfuðborgarsvæðinu leitar nú manns sem reyndi að lokka tvær stúlkur upp í bílinn sinn nærri Setbergsskóla í Hafnarfirði í gær.

Stúlkurnar, sem eru tíu ára, voru á leið heim úr skólanum í gær þegar karlmaður um fertugt reyndi að fá þær upp í bílinn sinn. Stúlkurnar sögðu að maðurinn hefði verið með sítt hár og gleraugu og á gömlum, bláum og ryðguðum bíl. Þegar maðurinn reyndi að fá þær upp í bílinn hlupu þær í burtu og sögðu mæðrum sínum frá atvikinu.

Lögreglan hefur rætt við stúlkurnar og segir Sævar Guðmundsson, aðalvarðstjóri á stöð lögreglunnar í Hafnarfirði, að lögregla taki ábendingar sem þessar alvarlegar. Enginn hafi þó verið handtekinn en lögregla sé á tánum og þiggi allar ábendingar í málinu. Unnið sé út frá þeim upplýsingum sem lögregla hafi fengið frá stúlkunum.

Skólastjóri Setbergsskóla sendi út tölvupóst til foreldra í skólanum með ábendingu frá móður annarrar stúlkunnar þar sem fólk er kvatt til að ræða við börnin sín og koma upplýsingum um málið til lögreglu ef fólk búi yfir þeim.