Níu handteknir vegna fíkniefnabrota í dag

Lögreglan á höfuðborgarsvæðinu handtók seinnipartinn í dag níu menn víðsvegar um bæinn vegna gruns um fíkniefnabrot. Húsleitir voru framkvæmdar á nokkrums stöðum í borginni og í þeim fundust um 100 grömm af hassi og lítilræði af öðrum efnum.

Það voru óeinkennisklæddir lögreglumenn á vegum fíkniefnadeildarinnar sem stóðu að aðgerðunum en málið reynist ekki viðameira en svo að mönnunum hefur öllum verið sleppt. Mennirnir voru ekki handteknir á sama stað en vakstjóri hjá lögreglunni vildi ekki staðfesta að einn þeirra hafi verið handtekinn á hóteli í miðborginni eins og vefmiðillinn Eyjan greindi frá fyrir stundu.