Útgjöld til félagsverndar aukast um 12 milljarða

Heildarútgjöld til félagsverndar jukust um nærri sex prósent á milli áranna 2004 og 2005, eða úr 210 milljörðum í 222 milljarða. Þetta leiða tölur Hagstofunnar í ljós.

Með félagsvernd er átt við framlög hins opinbera til að létta byrðum af heimilum og einstaklingum vegna tiltekinnar áhættu eða þarfar. Fram kemur í tölum Hagstofunnar að vöxtur félagsverndar hafi verið hlutfallslega mestur til málefna öryrkja eða 9 prósent milli áranna 2004 og 2005, sem svarar til 2,7 milljarða króna. Útgjöld vegna aldraðra jukust um 7,8 prósent eða 4,5 milljarða króna. Til heilbrigðismála jukust útgjöld um 5,6 prósent eða fjóra milljarða króna.

Veigamesti málaflokkur félagsverndar hérlendis er heilbrigðismál. Til heilbrigðismála var varið um 35 prósent heildarútgjaldanna en málefni aldraðra voru í öðru sæti með tæp 29 prósent. Í þriðja og fjórða sæti voru útgjöld vegna örorku með rúm 15 prósent og til fjölskyldna og barna með tæp 14 prósent.