Ökuþór dæmdur til að greiða 200 þúsund krónur í sekt

Karlmaður var í Héraðsdómi Norðurlands eystra í dag dæmdur til að greiða 200 þúsund krónur í sekt vegna ítrekaðra umferðarlagabrota. Maðurinn keyrði meðal annars án ökuréttinda og þá var hann tekinn með fíkniefni í sínum vörslum.

Maðurinn var sviptur ökuréttindum í febrúar á þessu ári eftir að lögreglan stöðvaði akstur hans við Elliðaá í Reykjavík. Daginn eftir var maðurinn tekinn fyrir akstur án ökuréttinda. Í sumar var maðurinn svo tekinn fyrir að hafa um 1,94 grömm af hassi í sínum fórum.

Fyrir dómi í dag var honum gert að greiða 200 þúsund krónur í sekt ella sæta fangelsi í 14 daga.

Maðurinn hefur margsinnis komist í kast við lögin og þá aðallega vegna umferðarlagabrota. Hann hefur mörgum sinnum verið sviptur ökuréttindum og þá hefur hann einnig verið dæmdur fyrir brot gegn lögum um ávana- og fíkniefni.