HV vill fimm meistaranámsleiðir á fimm árum

Fimm alþjóðlegar námsleiðir á meistarastigi, frumgreinanám í samstarfi við Háskólann í Reykjavík og sumarnámskeið í íslensku fyrir erlenda skiptinema eru meðal hugmynda sem Háskólasetur Vestfjarða vinnur að til framtíðar.

Forsvarsmenn setursins kynntu í gær framtíðarsýn sína í uppbyggingu háskólasamfélags á Vestfjörðum. Fram kemur í tilkynningu að fyrsta alþjóðlega námsleiðin á meistarastigi taki til starfa næsta haust en það er meistaranám í haf- og strandsvæðastjórnun í samstarfi við Háskólann á Akureyri. Einnig verður farið af stað með frumgreinanám á Vestfjörðum strax í upphafi næsta árs í samstarfi við Háskólann í Reykjavík.

Áætlanir Háskólasetursins gera ráð fyrir að starfsmenn þess verði orðnir 40 eftir fimm ár, þar af 20 kennarar í föstum stöðum. Einnig er gert ráð fyrir að fjöldi nemenda sem fara í gegnum Háskólasetrið árið 2011 verði orðinn um það bil 550 árið 2011, sem er ígildi tæplega 300 nemenda í heilsársnámi.