Spice Girls fá söngþjálfara

Stúlkurnar í Spice Girls, sem hyggja á endurkomu í desember, hafa aldrei verið taldar með bestu söngkonum heims. Þær vita það sennilega best sjálfar því þær hafa útvegað sér einn vinsælasta söngþjálfara Bretlands Zoe Tyler til að þjálfa sig fyrir endurkomutónleikaferðina.

Þær Emma Bunton, Victoria Beckham, Mel B, Geri Halliwell og Mel C munu allar sækja tíma hjá Tyler sem hefur unnið með mörgum af þekktustu söngvurum Breta í gegnum tíðina. Svo hrifnar eru þær af Tyler að þær vilja helst hafa hana með á hinu fjórtán tónleika ferðalagi sem hefst í Vancouver í Kanada 2. desember.