Færri umferðaróhöpp vegna umferðaröryggisviku?

Átján umferðaróhöpp voru tilkynnt til lögreglunnar á höfuðborgarsvæðinu á síðasta sólarhring og segir lögregla það með minnsta móti. Óhöppin voru nær öll minni háttar og ekki er vitað um nein teljandi meiðsli á fólki.

Segir lögregla að vera kunni að alþjóðleg umferðaröryggisvika eigi hér hlut að máli. Hún hófst í gær og því voru umferðarmál í brennidepli en ekki er ósennilegt að það hafi haft áhrif á ökumenn.

Sex manns voru hins vegar teknir fyrir hraðakstur og tveir fyrir ölvunarakstur á síðasta sólarhring og þá segir lögregla marga trassa að færa ökutæki til skoðunar og standa ekki skil á vátryggingu. Lögreglumenn eru mjög vel vakandi yfir því að þessir hlutir séu í lagi en í gær voru skráningarnúmer fjarlægð af nálægt tuttugu ökutækjum þar sem þessum atriðum var ábótavant.