Löggan með blikkljós á völdum gatnamótum

Á miðvikudag, fimmtudag og föstudag verða lögreglubifreiðar áberandi og með kveikt á bláum og blikkandi forgangsljósum á þrennum gatnamótum í Reykjavík þar sem mikið er um umferðaróhöpp. Þetta er gert í tilefni alþjóðlegrar umferðaröryggisviku sem stendur yfir dagana 23. - 27. apríl en hún er haldin að frumkvæði Sameinuðu þjóðanna. Íslendingar taka þátt í þessu verkefni en því er m.a. ætlað að vekja athygli á áhrifum umferðarslysa og hvetja til aðgerða á því sviði.

 

Í tilkynningu frá lögreglunni kemur fram að hægt sé að fækka umferðarslysum með ýmsu móti en að ábyrgðin liggi ekki síst hjá ökumönnum sjálfum. „Lögreglan á höfuðborgarsvæðinu leggur ríka áherslu á umferðareftirlit en þessa viku verða lögreglumenn enn sýnilegri ef eitthvað er," segir ennfremur.

 

Gatnamótin sem um ræðir eru: Miklabraut/Kringlumýrarbraut, Laugavegur/Suðurlandsbraut/Kringlumýrarbraut og Miklabraut/Grensásvegur. Lögreglubifreiðar verða á áðurtöldum gatnamótum fyrrnefnda daga frá klukkan 12-14 og 15.30-17.30.