Guðjón Bjarnason með tvær sýningar í New York

Listamaðurinn og arkitektinn Guðjón Bjarnason mun verða með tvær sýningar í New York í haust og vetrarbyrjun. Sú fyrri verður 25. september í SUNY College við Old Westbury á Long Island. Sú síðari er einkasýning á galleríi við 8th Avenue. Á sýningunni í SUNY College verða málverk, skúlptúrar, myndbönd, ljósmyndir og módel af arkitektúr Guðjóns.

"Ég er að sjálfsögðu ánægður með að hafa verið valinn hjá SUNY College," segir Guðjón Bjarnason í samtali við Vísi. "Það hafa margir mjög virtir listamenn sýnt þarna í gegnum árin."

Samhliða sýningunni í SUNY College, sem hlotið hefur nafnið SquARE zERO, verður efnt til málþings um verk og feril Guðjóns. Verður málþingið haldið 16. október í American-Scandinavian Foundation. Þar munu listfræðingarnir Lilly Wei og Jonathan Goodman fjalla um verk Guðjóns. Goodman er jafnframt fyrirlesari við Pratt Institute.

Einkasýning Guðjóns við 8th Avenue verður formlega opnuð þann 7. nóvember.