Fær 500 sinnum hærri laun en samherjarnir

David Beckham segir peninga ekki helstu ástæðu þess að hann ákvað að ganga í raðir bandaríska liðsins LA Galaxy í sumar, en þar mun hinn 31 árs gamli leikmaður verða á 500 sinnum hærri launum en félagar hans í liðinu.

"Ég vildi ekki fara þarna vestur þegar ég væri orðinn 34 ára gamall og sama hvað fólk segir, þá var ég ekki að fara þangað peninganna vegna. Mig langar að verða partur af því að færa knattspyrnuna á hærra plan í Bandaríkjunum og ég held að möguleikarnir þar séu meiri og betri en flestir gera sér grein fyrir. Fótboltinn er gríðarlega stór íþrótt allstaðar í heiminum nema kannski í bandaríkjunum og þar langar mig að kynna íþróttina fyrir krökkunum," sagði Beckham, sem þegar hefur komið á fót knattspyrnuskóla í Los Angeles.