Framlög til Landspítala aukast um tæpar 900 milljónir

Gert er ráð fyrir að rekstur Landspítala muni kosta rétt rúma 33 milljarða króna á næsta ári og jafngildir það um 883 milljóna króna hækkun að raungildi frá fjárlögum ársins 2007. Landspítalinn er stærsti einstaki útgjaldaliðurinn í fjárlagafrumvarpinu.

Farið er fram á 820 milljóna króna framlag til að styrkja núverandi starfsemi Landspítala og þar með talið að mæta auknum útgjöldum vegna lyfja og aukinnar starfsemi. Enn fremur er lagt til 245 milljóna króna framlag til að stytta bið eftir greiningu og meðferð á barna- og unglingageðdeild spítalans og jafnframt óskað eftir 5 milljónum króna til að ráða þar fræðslustjóra til að efla ráðgjafahlutverk deildarinnar.

Í fjáraukalagafrumvarpi 2007 er samtals gert ráð fyrir 30 milljónum króna til þessara tveggja verkefna. Þá er lagt til að 16,7 milljóna króna útgjöld færist til spítalans af öðrum liðum. Er þar í fyrsta lagi um að ræða 10,7 milljónir frá Heilsugæslu höfuðborgarsvæðisins.

Á móti koma tvær tillögur um að samtals 143 milljónir færist frá spítalanum og er í fyrra tilviki um að ræða 98 milljónir króna sem flytjast til félagsmálaráðuneytis vegna reksturs sambýla fyrir geðfatlaða sem áður voru hluti af geðsviði. Í síðari tillögunni er lagt til tæpar 53 milljónir flytjist til sjúkratrygginga sem jafnframt taki yfir framkvæmd samnings um tæknifrjóvganir.

Anna Lilja Gunnarsdóttir, framkvæmdastjóri fjárreiðna og upplýsinga, hafði ekki kynnt sér fjárlagafrumvarpið þegar Vísir hafði samband við hana og gat því ekki látið í ljós skoðun sína á því.