Málefni yngstu og elstu kynslóðanna forgangsmál næstu ára

Málefni elstu og yngstu kynslóðanna verða forgangsmál næstu ára samkvæmt langtímaáætlun í ríkisfjármálum sem kynnt er samhliða fjárlagafrumvarpi næsta árs. Fram kemur í frumvarpinu að auk þess muni ríkisstjórnin halda áfram uppbyggingu í samgöngumálum og heilbrigðis- og félagsmálum.

Bent er á að samkvæmt fjárreiðulögum beri ríkisstjórninni að leggja fram samhliða fjárlagafrumvarpi langtímaáætlun í ríkisfjármálum sem nái til þriggja næstu ára þar á eftir. Því leggur ríkisstjórnin nú fram langtímaáætlun fyrir árin 2008-2011.

Hyggst ríkisstjórnin forgangsraða verkefnum næstu fjögurra ára og er ætlunin að leggja fram endurskoðaða stefnumörkun á vorþingi þar sem vinna við forgangsröðun er ekki búin. 

Auk þess að setja elstu og yngstu kynslóðirnar í forgang er ætlunin að einfalda almannatryggingakerfið og fjárfesta meira í menntun og rannsóknum. Þá verður stóraukin áhersla á forvarnir í heilbrigðismálum. Enn fremur er stefnt að frekari skattalækunum á einstaklinga á kjörtímabilinu með það fyrir augum að bæta hag lágtekju - og millitekjufólks. Þær lækkanir verði hins vegar tímasettar í ljósi meginmarkmiða ríkisstjórnarinnar í hagstjórn.

Í langtímaáætlun sem fylgir fjárlagafrumvarpinu er enn fremur gert ráð fyrir að hagvöxtur á næsta ári verði aðeins 1,2 prósent en að hann vaxi svo á árunum 2009-2011. Enn fremur segir að tekjuafkoma ríkissjóðs versni eilítið árið 2009 og verði jákvæð um ellefu milljarða króna. Hins vegar muni ríkissjóður skila 27 milljarða króna afgangi árið 2010 og 35 milljörðum árið 2008.