Sturla vill breyta ýmsu í störfum þingsins

Sturla Böðvarsson, forseti Alþingis, hélt ávarp á þingsetningarfundi í dag. Hann hóf mál sitt á því að bjóða alþingismenn og aðra gesti velkomna til athafnarinnar en gestir voru mun fjölmennari nú en áður, þar á meðal var mökum þingmanna boðið að vera við athöfnina. Í ávarpinu vék hann að starfstíma þingsins og ýmsum öðrum breytingum sem hann telur vert að gera á störfum þingmanna og starfsháttum þingsins.

Í ávarpi Sturlu kom fram að hann hefði í sumar unnið að því að bæta ýmislegt í aðstöðu þingmanna og starfsháttum þingsins. Hann hefur mótað tillögur í þeim efnum með stuðningi forsætisnefndar. „Ég hef rætt við formenn stjórnmálaflokkanna og formenn þingflokkanna og kynnt þeim hugmyndir mínar um bætta starfshætti þingsins," sagði Sturla.

Sturla sagði að almennur stuðningur virðist vera meðal þingmanna fyrir því að starfstími Alþingis verði lengdur. „Með breytingu á starfstímanum er ekki stefnt að því að fjölga þingfundum heldur að þingstörf dreifist betur yfir lengri tíma til hagsbóta fyrir þingmenn og allt skipulag þingsins. Þannig gætu þingfundadagar verið jafnmargir og nú er en nefndadögum yrði fjölgað. Það mætti hugsa sér að taka viku og viku í þingnefndastörf einvörðungu, en slíkt gæti stuðlað að góðri samfellu í störfum nefnda við tímafrek mál."

Annað meginatriði í hugmyndum Sturlu er nýr rammi við umræður um þingmál á Alþingi. „Hér hef ég í huga að gera umræður markvissari og snarpari en nú er, en draga úr löngum ræðum og fá þannig betur fram mismunandi sjónarmið þingflokka og þingmanna til mála," sagði forseti. Sturla sagði einnig að næturfundir ættu ekki að þekkjast á Alþingi og sagði hann að þingmenn og starfsfólk Alþingis ættu eins og annað fólk að geta sinnt eðlilegu fjölskyldulífi, eins og hann orðaði það.

Sturla vék einnig að því að auðvelda ætti þingmönnum að efna til almennra umræðna um aðkallandi mál með skömmum fyrirvara. „Ég tel að slík almenn pólitísk umræða geti farið fram í upphafi hvers þingfundar og þar eigi jafnframt að vera möguleiki til þess fyrir þingmenn að eiga orðastað við fleiri en ráðherra, t.d. formenn nefnda og formenn þingflokka."

Síðasta atriðið sem Sturla nefndi og snéri að störfum Alþingis var sú brýna nauðsyn á að efla nefndarstarf þingsins. „Svigrúm nefnda til fundarstarfa er oft mjög þröngt. Það er þess vegna nauðsynlegt að gefa nefndum rýmri tíma í störfum Alþingis. Þá tel ég að efla beri hlutverk nefnda í eftirlitshlutverki þingsins. Sem lið í því væri eðlilegt að ráða sérstaka starfsmenn á skrifstofu þingsins sem einkum mundu vinna fyrir minnihluta í nefndum. Jafnframt tel ég að til greina komi að opna einstaka nefndarfundi fyrir fjölmiðlum," sagði Sturla að lokum.