Óvíst hvort McCartney verður við afhjúpun friðarsúlu

Tveimur af frægustu popptónlistarmönnum heimsins, Bítlunum Paul McCartney og Ringo Starr, er boðið að vera við afhjúpun friðarsúlu Yoko Ono í Viðey á afmælisdegi John Lennon. Allar líkur eru á að Ringo komi en ekki er víst með McCartney.

Liðlega aldarfjórðungur er nú liðinn frá því Lennon féll fyrir hendi morðingja í New York borg. Hefði Lennon lifað hefði hann orðið 67 ára gamall þann 9. október eða löggiltur ellilífeyrisþegi að íslenskum sið. Þann dag verður kveikt á friðarsúlunni.

Áhugi erlendra fjölmiðla er vaxandi á þessari vígslu og hafa fjölsótt vefsetur fjallað um friðarsúluna. AP-fréttastofan gerði henni rækileg skil með viðtali við Yoko fyrir helgi.

Öruggt má telja að erlendir fjölmiðlamenn flykkist til landsins til að sjá friðarsúluna rísa upp í næturhiminn að líkindum að viðstöddum eftirlifandi bítlunum tveimur.

Yoko segir að Ísland hafi orðið fyrir valinu sökum þess að landið sé vistvænt og reiði sig á jarðhita. Yoko segir súluna stærstu afmælisgjöfina sem hún hafi fært Lennon.

McCartney var hér aldamótaárið 2000 með konu sinni Heather Mills. Ringo var hér sumarið 1984 og lamdi sem kunnugt er húðir í félagi við Stuðmenn í Hallormsstaðaskógi.

McCartney og Ringo Starr eru án nokkurs vafa frægustu tónlistarmenn heims og hljósveitin þeirra the Beatles án tvímæla mesti frumkvöðull popp-sögunnar.

Fjórði bítillinn, og aðalgítarleikari sveitarinnar, George Harrisson, er látinn eins og John Lennon.