Þóra kveður Framnesveginn með söknuði

Þóra Sigurðardóttir, eða Þóra í Stundinni okkar, er eins og margir vita búin að söðla um. Hún dvelur nú langdvölum á Bahamas og hefur því ákveðið að selja raðhús sitt við Framnesveg. Um er að ræða eitt af sögufrægustu húsum Reykjavíkur sem kölluð eru Bankahús. Þau voru reist árið 1926 og voru fyrstu raðhúsin í Reykjavík.

Þóra segir það vera gert með töluverðum trega að setja húsið á sölu. Hún keypti það árið 2005 um það leyti sem hún og Völundur Snær, eiginmaður hennar, kynntust. "Húsið var varla íbúðarhæft en Völli kom sterkur inn" segir Þóra en þau hjónin réðust í miklar framkvæmdir. Þau reka nú veitingastað á Bahamas og eru sest þar að. Þóra segir nóg fyrir þau að eiga lítið afdrep hér heima og var því ákvörðun tekin um að selja. "Við eigum þó margar af okkar bestu minningum frá Framnesveginum. Þarna vorum við í tilhugalífinu og svo þegar við opnuðum brúðargjafirnar," segir hún og hlær.

Veitingastaður þeirra hjóna á Bahamas heitir Sabor og hefur hann náð miklum vinsældum. Þar er hægt að fá allt frá hamborgurum upp í nýveiddan fisk sem þau hjónin veiða stundum sjálf í soðið.

Þóra lætur Völund þó að mestu leyti um eldamennskuna en hún fær að hafa puttana í flestu öðru og hefur mikið haft að segja um útlit staðarins sem er hinn glæsilegasti með útsýni yfir hafið. Hjónin eru svo búin að festa kaup á öðrum stað sem er niðri við strönd og eru um þessar mundir að gera hann kláran.

Þóra er þó með fleira á prjónunum en hún er að skrifa unglingabók ásamt Mörtu Maríu Jónasdóttur sem kemur út hjá Sölku fyrir jólin. Bókin heitir Ef þú bara vissir en þær stöllur skrifuðu síðast Djöflatertuna sem kom út árið 2005.