Ók dópaður á götuvita og veittist að sjúkraliðum

Klukkan þrjú í nótt ók maður undir áhrifum fíkniefna á götuvita á mótum Grensásvegar og Bústaðavegar. Götuvitinn hafnaði á vélarhlíf bifreiðarinnar, en það hamlaði ekki förinni.

Maðurinn ók áfram til norðurs og stöðvaðist á strætisvagnaskýli sem er á mótum Grensásvegar og Hæðargarðs. Það var maðurinn fluttur á sjúkrahús með minni háttar áverka.

Eitthvað átti hann vantalað við sjúkraflutningamennina því hann veittist að þeim þennan stutta spöl á slysadeildina, og að sögn lögreglu veittist maðurinn einnig að starfsfólki slysadeildar eftir að þangað var komið. Maðurinn var því fluttur í fangageymslur á Hverfisgötu þar sem hann fékk að sofa úr sér. Bíllinn var hins vegar fluttur á brott með krana og er óökufær.