Treystir Svöfu fyrir milljarðinum

Róbert Wessman, forstjóri Actavis, hefur ákveðið að leggja fram 1 milljarð króna sem hlutafé og framlag í Þróunarsjóð Háskólans í Reykjavík, sem verið er að stofna. Róbert sagði í samtali við Vísi að hann teldi mikil tækifæri til þess að byggja upp samkeppnishæft alþjóðlegt háskólaumhverfi á Íslandi.

Róbert segir að HR gæti komist í fremstu röð skóla í heiminum. Slíkt myndi þó kosta mikinn pening. HR hafi fengið til sín erlenda kennara til að kenna við skólann. Að sama skapi gæti það hentað skólanum að fá öfluga erlenda nemendur til liðs við sig. Róbert telur mikla möguleika fyrir Háskólann í Reykjavík til samstarfs við aðra háskóla í heiminum. Þegar sé hafið samstarf við MIT háskólann í Boston.

Róbert segir að hann hafi ásamt konu sinni oft stutt við bakið á ýmsum góðum málefnum. Þetta sé hins vegar stærsti styrkurinn sem hann hafi veitt nokkrum aðila. Raunar telji hann að þetta sé stærsti styrkur sem einstaklingur hafi veitt. Róbert segist hafa unnið lengi með Svöfu Grönfeld, rektor í HR í mörg ár. Svafa hafi sannfært hann um ágæti þess að styðja við skólann.

Ekki er langt síðan að Róbert seldi hlutabréf sín í Actavis fyrir rúma 12 milljarða.