Einelti hjá fimmta hverjum ríkisstarfsmanni

Starfsmannaskrifstofa ríkisstofnanna vinnur nú að stefnumótun og verkefnaáætlun sem miðar að því að bæta starfsumhverfi ríkisstarfsmanna. Einelti á vinnustöðum ríkisins er eitt þeirra atriði sem gefinn verður aukinn gaumur. Samkvæmt könnun í fyrra á einelti telur nær fimmti hver ríkisstarfsmaður, eða 17%, sig hafa orðið fyrir einelti í starfi. Þar af 10% sem segja að eineltið hafi átt sér stað oftar en einu sinni.

Í fréttabréfi stjórnenda ríkisstofnanna í dag er fjallað um þetta mál. Þar kemur m.a. fram að í fyrrgreindri könnun voru ríkisstarfsmenn spurðir hvort þeir hefðu orðið fyrir einelti á núverandi vinnustað og var einelti skilgreint sem „endurtekin neikvæð framkoma gagnvart einstaklingi/um yfir ákveðið tímabil sem hann eða þeir upplifa sem særandi og/eða niðurlægjandi".

Þátttakendur voru starfsmenn í 50% starfshlutfalli eða meira hjá 144 ríkisstofnunum. Tæp 17% töldu sig hafa orðið fyrir einelti, þar af 10% oftar en einu sinni. "Þessar niðurstöður eru hærri en gera mátti ráð fyrir út frá almennum viðmiðunartölum og ber að taka þær alvarlega. Hér verður rýnt nánar í niðurstöðurnar og fjallað um hvernig bregðast eigi við," segir í fréttabréfinu.