Mætti á löggustöð til að tilkynna um tjón og var handtekinn

Karlmaður á þrítugsaldri var handtekinn á lögreglustöðinni í Breiðholti í gær en þangað kom maðurinn til að tilkynna um tjón sem hann hafði orðið fyrir. Maðurinn reyndist í annarlegu ástandi og var hann umsvifalaust handtekinn fyrir að aka undir áhrifum fíkniefna.

Að sögn lögerglu voru málavextir á þá leið að maðurinn lagði bíl sínum á bílastæði í hverfinu fyrr um daginn en þegar hann sneri þangað aftur eftir að hafa sinnt erindum sínum var greinilegt að ekið hafði verið á bílinn hans. Til að bæta gráu ofan á svart hafði tjónvaldurinn ekið af vettvangi án þess að láta vita af óhappinu.

Vandræði tjónþola voru hins vegar ekki á enda því hann var handtekinn þegar hann hafði komið þessum upplýsingum á framfæri hjá lögreglu. Ekki var efast um frásögn mannsins en strax við komu hans á lögreglustöð vöknuðu grunsemdir um að hann væri í annarlegu ástandi. Svo reyndist vera og var hann því handtekinn fyrir að aka undir áhrifum fíkniefna.