Ingibjörg Sólrún boðar mjúka utanríkisstefnu

Framlag Íslendinga á alþjóðavettvangi verður í framtíðinni í formi sérfræðinga en ekki vopnaðra sveita. Ingibjörg Sólrún Gísladóttir utanríkisráðherra boðar "mjúka" utanríkisstefnu og varnarstefnu sem byggi á samráði allra stjórnmálaflokka. Þetta kom fram á ráðstefnu sem haldin var í dag.

Þó að yfirskrift ráðstefnunnar sé Kapphlaupið á Norðurpólinn, þá notaði Ingibjörg Sólrún tækifærið til að kynna hugmyndir sínar um breytta, í raun gjörbreytta, stefnu í öryggis- og varnarmálum Íslendinga. Hörð stefna víkur fyrir mjúkri og vopnaðar sveitir - eins Íslendingar hafa haft í Afganistan - virðast heyra sögunni til.

Fulltrúar danska flotans og sænska hersins voru meðal þeirra sem komu til að ræða kapphlaupið á Norðurpólinn - en fengu í staðinn fyrstu opinberu yfirlýsingu nýs utanríkisráðherra um breyttar áherslur í varnar- og alþjóðamálum - áherslur sem byggi á samráði innanlands.

Ingibjörg Sólrún sagðist í ræðunni vilja stofna samráðsvettvang stjórnmálaflokkanna um öryggis- og varnarmál, öfluga rannsóknarstofnun um þau mál og skilja vel á milli innra og ytra öryggis. Tilhneigingin undanfarið hefur verið að blanda saman lögreglu og her, eins og til dæmis Bandaríkjamenn hafa mjög gert í hinu svokallaða stríði gegn hryðjuverkum. Utanríkisráðherra vill fara í þveröfuga átt.