Tíu sjávarútvegsfyrirtæki með helming af kvótanum

Fiskistofa hefur gefið út skiptingu á kvótanum fyrir næsta fiskveiðiár sem hefst nú 1. september. Í ljós kemur að tíu stærstu sjávarútvegsfyrirtækin ráða nú yfir 49% eða rétt tæpum helming af heildarkvótanum. Af þeim er HB Grandi langstærstur með rúmlega 10% af kvótanum eða sem nemur 30.000 þorskígildistonn.

Næst á eftir HB Granda er Samherji á Akureyri með rétt rúmlega 7% af kvótanum eða sem svarar 21.500 þorkígildistonnum. Við hlið Samherja kemur svo Brim með slétt 7% af kvótanum eða 21.000 tonn.

Í fjórða sæti er Þorbjörn hf. með kvóta upp á rúm 5% eða 15.500 tonn og í fimmta sæti er FISK Seafood með um 4,5% eða 13.500 tonn. Þessi fimm stærstu fyrirtæki ráða því um þriðjungi af heildarkvótanum á næsta fiskveiðiári. Næstu fimm fyrirtækin eru með um og yfir 3% af kvótanum hvert.