Segja vísindaveiðar hafa verið stundaðar innan hvalaskoðunarsvæða

Hvalaskoðunarsamtök Íslands skora á Kristján Möller ráðherra ferðamála og Össur Skarphéðinsson tilvonandi ferðamálaráðherra að hlutast til um að ákvörðun sjávarútvegsráðherra um að gefa út kvóta til hrefnuveiða fyrir innanlandsmarkað verði endurskoðuð. Samtökin segja vísindaveiðar hér við land hafa skaðað hvalaskoðun til landsins og veiðar hafi verið stundaðar innan hvalaskoðunarsvæða.

Bent er á í tilkynningu frá Hvalaskoðunarsamtökunum að frá því að vísindaveiðar hafi hafist hér við land árið 2003 hafi hrefnum fækkað stórlega á þeim svæðum sem hvalaskoðun er stunduð. Jafnframt hafi þeim tilfellum sem tekst að sýna hrefnur í návígi fækkað. Samkvæmt upplýsingum á vef Hafrannsóknarstofnunar hafi tugir dýra verið skotnir innan hvalaskoðunarsvæða þrátt fyrir loforð um hið gangstæða frá fyrrverandi sjávarútvegsráðherra. Veiðarnar hafi þegar skaðað hvalaskoðun og þar með upplifun tugþúsunda ferðamanna.

Gagnrýna veiðikvóta fyrir innanlandsmarkað

Samtökin fagna yfirlýsingu Einars K. Guðfinnssonar sjávarútvegsráðherra að ekki verði gefinn út meiri hvalveiðikvóti fyrr en tekist hafi að selja afurðirnar. Hins vegar furða samtökin sig á yfirlýsingu sjávarútvegsráðherra í fréttum RÚV á laugardag um að áfram verði gefinn út kvóti til veiða fyrir innanlandsmarkað.

„Með slíka yfirlýsingu yfir höfði sér mun markaðssetning hvalaskoðunarferða áfram verða erfið og það er óskiljanlegt að ráðherra hafði ekki fyrir því nú, frekar en áður að ræða við samtök hvalaskoðunarfyrirtækja né samtök ferðaþjónustunnar um þá ákvörðun í ljósi þess að innanlandsmarkaður fyrir hvalkjöt er nær engin miðað við þann ágóða sem þjóðarbúið hefur af erlendum ferðamönnum," segir í tilkynningu samtakanna.

Skora samtökin jafnframt á Kristján Möller, ráðherra ferðamála, og Össur Skarphéðinsson, tilvonandi ferðamálaráðherra, að hlutast til um að þessi ákvörðun sjávarútvegsráðherra verði endurskoðuð og allar frekari ákvarðanir um áframhald hrefnuveiða verði skoðar út frá heildarhagsmunum þjóðarinnar.

Þá áréttar stjórn Hvalaskoðunarsamtaka Íslands að hrefnuveiðar geti ekki fallið undir þá skilgreiningu að teljast sjálfbærar þar sem efnahagsleg áhrif af hvalaskoðunarferðum og ferðaþjónustu þeim tengdri vegi mun þyngra en hvalveiðar.