Segir ökutækjatryggingu greiða sjúkrakostnað vegna rútuslyss

Ökutækjatrygging rútunnar sem keyrði út af veginum í Bessastaðabrekku í Fljótsdal síðastliðinn sunnudag greiðir sjúkrakostnað þeirra 15 erlendu starfsmanna sem slösuðust í rútuslysinu.

Þetta segir Gísli Rafnsson, svæðisstjóri Arnarfells. Hann segir að allir starfsmennirnir eigi að vera með sínar sjúkratryggingar í lagi, bæði þeir sem starfi hjá Arnarfelli og hjá öðrum undirverktakafyrirtækjum. Hann segir líðan starfsmannanna vera góða og búið sé að útskrifa sjö þeirra af spítölum. Sjö verkamenn hlutu beinbrot við slysið en aðrir voru með lítilsháttar meiðsl.