14 ára drengur stingur önd

14 ára drengur er grunaður um að hafa stungið kvenkyns önd á Huntington Beach í Kaliforníu í síðustu viku.

Öndin sást fyrst á fimmtudaginn í síðustu viku þar sem hún vappaði um bæinn með vasahníf í bakinu.

Sjálfboðaliðar leituðu andarinnar í tvo daga áður en hún fannst klukkan 10 á sunnudagsmorgun og var færð til aðhlynningar á bráðamóttöku dýraspítala.

Starfsmenn náttúruverndarsamtaka á svæðinu segja að öndin, sem þeir kalla ,,Lucky" hafi sloppið ótrúlega vel, en hnífurinn skaðaði ekki mikilvægustu líffæri.

,,Lucky" er þriggja mánaða gömul og með skerta flughæfni og telja starfsmennirnir að hún hafi verið auðvelt fórnarlamb.

Corby Bright, lögreglustjóri sagði í samtali við The Orange County Register að rannsókn á málinu stæði yfir og að drengurinn hafi ekki verið handtekinn.