Ný reiðhöll í Dýrafirði

Vestfirðingar fjölmenntu á opnunarhátíð Knapaskjóls, nýrrar reiðhallar á Söndum í Dýrafirði, sem var formlega vígð í gær.

Það er hestamannafélagið Stormur sem stóð fyrir byggingu hallarinnar. Nú á að bæta aðstöðu til iðkunnar hestaíþrótta á Vestfjörðum, aðstöðu til þjálfunar, keppni, reiðkennslu og annars er varðar íslenska hestinn.

Reiðhöllin, sem er hin glæsilegasta er 820 fermetrar, og á einnig að nýtast í tengslum við menningartengdaferðaþjónustu í Dýrafirði og Arnarfirði.

Vestfirðingar fjölmenntu á opnunarhátíðina og komu ríðandi hver á fætur öðrum á þvílíkum eðalklárum að annað eins hefur ekki sést þar vestra um langa hríð að sögn viðstaddra. Meðal gesta voru þeir Magnús Stefánsson félagsmálaráðherra og Einar Guðfinnsson sjávarútvegsráðherra.