Tók Ísland framyfir Alaska

Mikil leynd hvílir yfir komu stórleikarans Leonardo DiCaprio hingað til lands í myndatöku fyrir tímaritið Vanity Fair. Fréttablaðið greindi frá því að von væri á DiCaprio í gær og var upphaflega reiknað með honum síðdegis. Talsverðar breytingar hafa þó átt sér stað á ferðatilhögun DiCaprio, en áður en blaðið fór í prentun var talið líklegt að leikarinn myndi lenda að næturlagi til að forðast óþarfa áreiti.

Meðal þeirra sem voru í föruneyti DiCaprio eru fjölmiðlafulltrúi leikarans og unnusta, fyrirsætan Bar Rafaeli, en hún sat fyrir í einu vinsælasta tímaritaeintaki heims, baðfatablaði Sport Illustrated.

Annie Leibovitz, einhver frægasti ljósmyndari heims, tekur myndirnar en hún er hálfgerður hirðljósmyndari þotuliðsins í Hollywood. Starfsmenn Leibovitz komu hingað fyrir nokkrum dögum og leituðu heppilegra staða og voru augljóslega mjög ánægðir með það sem fyrir augu bar.

Upphaflega stóð til að stjörnuhersingin héldi til Alaska fyrir myndatökuna en þegar frá því var horfið kom upp sú hugmynd að fara Íslands. Í fyrstu var þó einungis reiknað með stuttu stoppi og að leikarinn myndi ekki einu sinni hafa næturdvöl hér á landi en DiCaprio krafðist þess að fá að kynnast næturlífi Reykjavíkur sem og landinu.

Samkvæmt upplýsingum Fréttablaðsins mun DiCaprio, starfsfólk Vanity Fair og True North eyða stærstum hluta dvalarinnar í að ferðast um landið og finna heppilega tökustaði en heimildir blaðsins hafa verið á reiki um hvar þær færu fram. Upphaflega var talið að DiCaprio yrði myndaður á Snæfellsjökli og þá voru einnig sögusagnir á kreiki um að þær færu fram við Jökulsárlón. Og var því fleygt fram að leikaranum yrði komið fyrir út á ísjaka í miðju lóninu.

Ekkert fékkst þó staðfest í þessum efnum og Einar Björn Einarsson, staðahaldari í Jökulsárlóni, kannaðist ekki við komu True North eða stórrar kvikmyndastjörnu þegar Fréttablaðið hafði samband við hann. Starfsfólk True North var þögult sem gröfin þegar Fréttablaðið leitaði svara og Finnur Jóhannesson, sem unnið hefur baki brotnu við að undirbúa komu leikarans hingað, vildi ekkert láta hafa eftir sér.