Þorskeldi er enginn gullgröftur

Einar K. Guðfinnsson sjávarútvegsráðherra sagði í ræðu á opnum fundi Matís um þorskeldi á Ísafirði í gærdag að menn skyldu gá að sér í fiskeldi. "Mér finnst ég skynja núna dálítið svipaða umræðu um þorskeldið og í árdaga þeirrar atvinnustarfsemi, gullgrafarastemminguna. Hún á lítinn rétt á sér," sagði ráðherrann.

Einar segir að þorskeldið sem fyrr krefjist mikils fjármagns og þekkingar sem fæst bara með reynslu og vísindalegri nálgun. "Menn byggja ekki upp þorskeldi eins og hendi sé veifað," segir Einar.

Einar segir uppbyggingu á þorskeldi í atvinnuskyni mjög mikilvægt en um leið áhættusamt langtímaverkefni sem krefjist samstillts átaks opinberra aðila og einkafyrirtækja.