7400 fermetra nýbygging á Alþingisreitnum

Til stendur að byggja 7400 fermetra byggingu vestan við Alþingishúsið sem hýsa á skrifstofur Alþingis, Þetta kom fram á fréttamannafundi sem Sturla Böðvarsson, forseti Alþingis, og fulltrúar borgarinnar efndu til til þess að kynna nýtt deilisskipulag á Alþingisreitnum.

Hugmyndir um að byggja yfir alla starfsemi Alþingis á svokölluðum Alþingisreit sem afmarkast af Kirkjustræti, Vonarstræti, Tjarnargötu og Templarasundi hafa lengi verið til umræðu en lausn virðist nú í sjónmáli.

Í tillögu að deiliskipulagi sem kynnt var í dag er gert ráð fyrir að nýbygging upp á 7100 fermetra rísi vestan Alþingishússins og verður hún tengd Alþingishúsinu með 300 fermetra glerbrú. Þá verður 1900 fermetra bílakjallari undir húsinu fyrir 75 bifreiðar. Húsið verður stallað þannig að það verður jafnhátt Oddfellow-húsinu þar sem það er hæst en minnkar eftir því sem nær dregur Austurvelli.

Í framhaldinu er ætlunin að losa allt leiguhúsnæði Alþingis sem nemur um fjögur þúsund fermetrum og selja húseign Alþingis utan reitsins, Þórshamar við Templarasund. Fram kom í máli Sturlu Böðvarssonar að Alþingi hefði hingað til borgað nærri átta milljónir króna á mánuði í húsaleigu.

Til þess að þetta sé mögulegt þarf að flytja húsið að Vonarstræti 12, svokallað Skúlahús, og verður það flutt á horn Tjarnargötu og Kirkjustrætis við hlið Skjaldbreiðarhússins. Skjaldbreið verður endurbyggð í sem næst upprunalegri mynd en hún hefur verið í mikilli niðurníðslu.

Fram kemur í tilkynningu frá Alþingi að nokkrar athugasemdir hafi komið fram við auglýsta deiliskipulagstillögu en það er niðurstaða forseta Alþingis, sem er studd af forsætisnefnd Alþingis, að koma megi til móts við framkomnar athugasemdir í veigamiklum atriðum. Sturla Böðvarsson sagði enn fremur að hann legði áherslu að gera götumyndina við Kirkjustræti sem besta.

Tillögurnar hafa verið unnar í samráði við borgarstjóra og skipulagsráð Reykjavíkurborgar og er þess vænst að þær verði afgreiddar formlega af Reykjavíkurborg fljótlega. Þá kom fram á blaðamannafundinum að Torfusamtökin hefðu lagt blessun sína yfir tillöguna.

Þegar skipulagið hefur verið samþykkt mun verða hafist handa við hönnun nýbyggingarinnar, undirbúning viðgerðar og flutning gömlu húsanna auk fornleifaathugana á byggingarreitnum. Þá verður unnið að frumáætlun um kostnað og framkvæmdir. Ekki ligggur fyrir hvenær framkvæmdir hefjast eða hver kostnaðurinn við þær verður.